mk-MKen-US
Општина
Центар

Новости

Со одлука на општина Центар, наместо улица – нови дрвја, зеленило и урбана опрема

  • 20 март 2017
  • Број на прегледи: 157
  • 0 Коментари

Советниците на општина Центар со 12 гласа ЗА, донесоа одлука за изглед на градба, пешачки улици и патека на ул. Кеј 13-ти Ноември, на потегот од улица “Филип Втори Македонски“ до објектот на Телеком.

Граѓаните – сопственици на објектите на кејот на Вардар кои присуствуваа на седницата, со аплауз го поздравија носењето на оваа одлука, со што на овој потег нема да се гради улица, туку според програмата на општината, ќе биде поставено зеленило, клупи, чешми и жардинери со дрвја кои би имале функција на дрвореди.

Советниците од советничката група предводена од ВМРО-ДПМНЕ жестоко се спротивставија на ваквата одлука и прашаа што ќе биде постигнато со носењето на вакви документи. Иако рекоа дека ќе застанат зад интересите на граѓаните и ако граѓаните се изјаснат тука да нема улица, туку да остане пешачка патека, сепак – не гласаа за одлуките.

Градоначалникот на општина Центар, Андреј Жерновски, одговори дека одлуките се носат за стопирање на градба на улица на кејот на Вардар.

“Ние водиме сметка за интересите на граѓаните и убедени сме дека најголемиот дел од нив се против уништување на шеталиштето на кеј. Одобрението за изградба на оваа улица е издадено од градоначалникот на Скопје, Коце Трајановски, во сабота, на 31-ви декември, денот на дочекот на новата 2017-та година, а пред два дена, во сабота, инвеститорот почна со изведување на градежните работи без никаква документација за изградба на ова градилиште. Битката ќе ја водиме до крај, со сите законски можни механизми. Ги повикувам граѓаните да ни се придружат, за да не го изгубиме шеталиште на кеј“, рече Жерновски.

Претседателот на Советот, Мирослав Шиповиќ, кажа дека Советот за одлуката на Коце Трајановски дознал во петокот и затоа е свикана вонредна седница. На прашањето зошто за 4 години ДУП-от “Мал Ринг“ не е изменет, Жерновски одговори дека конзерваторите две и пол години не ги даваат потребните дозволи за да се носи нов ДУП. Ова, рече тој, се прави сега поради претстојните избори, новата влада и да се задоволи оној кој сето ова го платил. Досега, Законот за градење претрпел 25 измени, а Законот за просторно и урбанистичко планирање од 2014-та година, променет е 4 пати само за да се одземат ингеренциите на општина Центар.

Советниците од коалицијата предводена од СДСМ го задолжија Секторот за инспекциски работи на општина Центар веднаш да спроведе инспекциски надзор за преземените градежни активности на терен, на потегот од улицата “Филип Втори Македонски“ до Камениот мост.

Ова е со цел да се утврди дали е сторена повреда или пропуст во однос на преземените теренски градежни активности од инвеститорот или од надлежни органи за изградба на улицата.

Печати
 
Означувања:
Оценете ја оваа вест:
Нема оценка

Ве молиме најавете се или регистрирајте се за да објавувате коментари.